Usenetha laye ngu“MP”

Ukhetho olumanyanisiweyo olukhangelelwe mhlaka 29 Mbimbitho 2008 selusondele. Ngosuku lolu uzulu uzakhetha uMongameli welizwe, amalunga edale leSenethi, amalunga edale leHouse of Assembly lamakhansila.

Imihlangano lenhlelo zokukhankasela uketho lolu isenqongweni. Sekunanzelelwe ukuthi inengi lalaba abakhankasayo lenhlanganiso ezibakhankaselayo kabaqedisisi ngokuma kwedale lePhalamende.

Kukanengi sibona imibiko ethi abantu bazavotela uMP lo Senetha mhlaka 29 Mbimbitho 2008. Lokhu kucina kusenza olaleleyo acabange ukuthi uSenetha kasiye MP. Kakuqondanga lokhu. Iqiniso yikuthi ababili laba ngabameli beziqinti edale njalo bonke babizwa ngokuthi ngabo MP, lokhu kumele ukuthi “Member of Parliament”.

Bathi sebekhethiwe babizwe ngelokuthi “Honourable” okutsho ukuthi umhlonitshwa. Yikho nje umangabe ibizo lomeli wedale libizwa kumbe lilotshwa landulelwa yisakhi “Hon”. Ngakho ke, abameli bedale lePhalamende babizwa ngelokuthi “Hon” njalo behlukaniswa ngedale abahlala kulo.

AmaSenetha lawo ngama MP. Umehluko yikuthi uSenetha uqhuba umsebenzi wePhalamende esedale leSenethi kukanti lo omunye umeli wesiqinti ubasedale leHouse of Assembly. Laye ngu MP njalo igama lakhe landulelwa ngesakhi “Hon” lapha libizwa kumbe lilotshwa.

Makunanzelelwe ke ukuthi akuqondanga ukuthi kulo loSenetha lo MP. Wonke umuntu okhethwa abesededale emele isiqinti esithize edale lesenethi kumbe eleHouse of Assembly ubizwa ngokuthi MP.

Ngu Wellington Nkala

Share This Post

Tweet

Posted by Intatheli yeMetro on March 14, 2008. Filed under Local News. You can follow any responses to this entry through the RSS 2.0. Both comments and pings are currently closed.