NGENXA yokwesaba ukulotsholiswa isidumbu, enye indoda yePhikelela indawo eseMahole, eFilabusi, izibophele kulandela ukubhubha kukamama ebihlalisana laye ingamlobolanga.

Lesi sehlakalo esitshiye izakhamizi zimangele senzakale ngeviki ephelileyo njalo kubikwa ukuthi isidumbu sikamama lo obhubhileyo uSvodai Ndlovu silokhu sihlezi emotsha eFilabusi ngoba kungelamuntu okwaziyo ukuthi lumuntu ubevele edabuka kuphi sibisibili.

Izothamlilo zeFilabusi zithi uGeorge Maphosa obeyisakhamuzi sakule indawo ubehlala lalumama okwesikhathi eside kodwa ngokuswelakala kwenhlanhla lumama usuke wagula, wasesedlula ngeviki ephelileyo.

“Lokhu kuhle kwahlukumeza umoya kaGeorge lo obesazi ukuthi abazali bakaMaNdlovu abadabuka eMberengwa bangabalakho ukuhlupha ngoba yena engaziwa njengomkhwenyana, phela ubezitshayela amapoto lalumama.

“Ngenxa yalokhu uGeorge usuke wasesiyazibophela eduzane lesifula sethu uPangani wazatholakala yizakhamizi,” kulandisa uMnumzana Sukuzukuduma Mhlanga oyisakhamuzi.

Wengezelele wathi linto itshiye izakhamizi ziphelelwe ngoba akekho okwaziyo ukuthi lumama udabuka kuphi.
Kubikwa ukuthi uGeorge utshiye elobe incwadi echaza ukuba kungani ethethe impilo yakhe ethi yena ‘angilankukhu, ngitsho yena ubabhemi idonki empilweni yami kungakho ke ngikubone kungcono ukuthi ngithathe impilo yami ngoba ngiyazi ukuthi abangakomkami bangangidlisa ubhulo, phela angimlobolanga lumntwana njalo angaziwa khonale eMberengwa’.

“Osokuhlupha izakhamizi yikuba sizaqonda kuphi lesidumbu lesi esikwazi singeseMberengwa nje kuphela. Kambe yona iMberengwa le singathi sivele singayazi sizayabikela bani,’ kutsho usobhuku wakule indawo, unkosazana Margaret Gumbo.

Uqhubekele phambili wathi kuke kwaba labanye abazukulu bakaMaphosa abafika bethi bazama ukuphathisa ekudingeni izihlobo zikaMaNdlovu kodwa basuke basebenyamala.

“Okwamanje sikhangelane lodubo lokuthi sizakwenzani ngesidumbu somntanabantu,” kuphetha uNksz Gumbo.