Iqembu lakwele Spain iBarcelona kubikwa selizimisele ukuthengisa umdlali walo uRonaldinho ngemali engange 12 miliyoni pounds. Kubikwa lokhu kungenzakala ekupheleni kwayonale isizini.

Kukhanya iqembu eliqeqetshwa nguFrank Rijkaard lithethe inyathelo leli nje ngenxa yezenzo ezimbi ebezisenziwa ngumdlali lo, ophuma kweleBrazil kanti njalo bathe akulaqembu elingathenga umdlali ongadlalanga kangako lonyaka.

IBarcelona yayithe iqembu elifuna uRonaldinho kumele lizimisele ukukhupha imali engange 85 miliyoni pounds kodwa limali siyehliswe okwamagama.

Ngenyanga kaMpandula nyakenye iqembu leChelsea kubikwa lazama ukuthenga uRonaldinho ngemali engange 11,6 miliyoni pounds kodwa iBarca yala yathi leyomali incane kakhulu ngendlela uRonaldinho adlala ngayo.

Kodwa ke kukhanya konke lokhu sekukhohlakele mhlawumbe yikukhukhumezwa akunikezwa liqembu okwenza umdlali lo abeyisiqoqodo.

Lanxa kubikwa engathengiswa nge 12 miliyoni pounds intengo le ilakho ukukhuphuka ngoba kulamaqembu amathathu okubikwa esemkhangele ngamehlo abomvu.

ESpain kuleReal Madrid eliyingwe lenja leBarcelona, eItaly kubikwa iAC Milan layo iyamfuna kuthi kweleNgilandi iChelsea ayibuquthi ngaye.

Lokhu kuzenza amaqembu wonke la, angadondiyo ukukhupha imali, encintisane ukuze kusale elilodwa kuphela elizakhuluma imali ethe xaxa.

Kusenjalo ilizwe leBrazil linqobe iSweden 1-0 ngoLwesithathu emdlalweni okade ungowobungane njalo kukhunjulwa ifinal yeWorld Cup eyadlalwa ngomnyaka ka1958 phakathi kwamazwe womabili.
Kulowomdlalo iBrazil eyayikhokhelwa ngu Pele yakhulela iSweden 5-2.

Eminye imidlalo yobungane edlalwe ngoLwesithathu iFrance inqobe iEngland 1-0, iTunisia yakhulela iIvory Coast 2-0 kwathi iSouth Africa yabhula iParaguay 3-0.

Abafana beZimbabwe banqobe omakhelwane iBotswana 1-0 emdlalweni odlalelwe eGaborone.
UCuthbert Malajila nguye ohlohlele amaWarriors.

-NguSikhumbuzo Moyo