INTSHA yebandla leApostolic Faith Mission Church in Zimbabwe eseNkulumane edolobheni lakoBulawayo isele ibambe owangaphansi ngemva kokuthi itshelwe ukuthi ikhuphe imali engange 100 rand ukuze benelise ukuya emhlanganweni omkhulu webandla leli ozakwenzelwa eMasvingo, iphephandaba likazulu liyakuveza lokhu.

Umhlangano lo uzakubakhona ekuqaleni kukaMabasa.

Abafakazi abaqotho abangamalunga ebandla leli okumele bahambe kulo umhlangano babikele leliphephandaba ukuthi umhlangano lo wenziwa minyaka yonke lapho intsha yonke yebandla leli ilizwe lonke jikelele iyabe ibuthene.

Omunye ujaha ongathandanga ukuthi igama lakhe laziwe hlezi abanye abazalwane bamsole uthe isenzo sebandla lakhe sibamangalisile ngempela njalo asitshengisi ukuthi libandla labantu bonke leli kungakhathalekile ukuthi ulemali kumbe hatshi.

“Lokhu akukaze kwenzakale kubandla lethu, iminyaka yonke le besihamba sibhadala imali yakuleli ukuthi lonyaka kuguqukeni angazi. Lokhu kutsho ukuthi lonyaka thina esingenelisi ukuthola amarand lawa ngeke sahamba,” kutsho lujaha.

Uqhubeke esithi kuyabamangalisa ukuthi lasenkonzweni inkohlakalo lokukhwabanisa sekungenile kukanti abafundisi bahlala betshumayeza abantu besithi inkohlakalo lokukhwabanisa kubi kakhulu njalo yisono.
“Umbuzo yikuthi uma bekhona abazayibhadala limali ngamarand kuzamele bayiguqulele kumali yakithi, pho bazayithengisela bani, ngayiphi irate, njalo bazakuba bebangaki abakwenzayo lokhu?” kubuza omunye njalo othe ungena kulelibandla. Kubikwa abakhulu balelibandla bayazi ukuthi umhlangano lo uqakathekile ukuthi yonke intsha ifuna ukuhamba yikho nje sebesithi kubhadalwe iR100.

Emkambo omnyama iR100 ithengiswa nge$600 million. Imizamo yokukhuluma labakhulu balelibandla yehlule kuthiwa kabakho. Omunye umama odobhe ucingo othe igama nguNkosikazi Chinanga uthembise ukuthi uzakubadinga abakhulu balelibandla kodwa kasazange atshaye ucingo esitsho ukubana ubatholile kumbe hatshi.