CAESAR Zvayi, mutapi wenhau wepepa reThe Herald uyo akamanikidzwa kubuda munyika yeBotswana maainge atorwa nechikoro cheUniversity of Botswana kuti adzidzise matapirwo enhau ikoko, anoti chiitiko ichi hachizomushaise hope sezvo aine kodzero yekutsigira mufungo wake munyaya dzezvematongerwo enyika.

Zvayi, uyo aishanda saFeatures and Political Editor wepepa guru iri akadzoka mushure mekunge mutungamiriri weBotswana Ian Khama, amanikidzwa kusaina gwaro rekumutandanisa munyika iyi nevasingadi hutongi hweHurumende yaZimbabwe.

Zvisinei, Zvayi akaudza nhepfenyuro yeNewsnet kuti haaizokonewa kupfodora hope nechiitiko ichi, akawedzerazve achiti haana kumbove nefungidziro yekuti nyika iri mudunhu reAfrica ingaudzwe zvekuita nedziri musangano reEuropean Union idzo dzisinei nemamiriro eiri dunhu.

Zvichakadai, munyori mukuru mubazi rekukushwa kwemashoko muhofisi yemutungamiri wenyika, George Charamba, vakamhura danho remasangano anomirira vatapi venhau ayo anosanganisira Media Institute of Southern Africa (MISA) neZimbabwe Union of Journalists (ZUJ) nekukundikana kwawo kupindira munyaya yaZvayi setarisiro yaivepo.

Nyangwezvo aya masangano ariwo anomirira kodzero dzevatapi venhau munyaya dzemashandiro nekodzero dzavo, rwendo rwuno havana kana shoko rimwechete ravakati bufu maererano nekubatwa neseri kweruoko kwaZvayi.

Charamba vakati chinhu chinoshamisa zvikuru kuona vezvematongerwo enyika varivo vanoenda mberi kwevatapi venhau pakutora matanho nekupakurwa kwemashoko.