UMongameli Robert Mugabe uthi usibalukhulu webhanga elikhulu lelizwe uMnu Gideon Gono kasoze atshiye umsebenzi njengalokhu okufunwa libandla leMDC.

Embikweni awethule ngoMvulo, emsakazweni we ZBC, uMugabe uveze ukuthi eleBhilithani yilo elikhanya likhokhela umkhankaso wokuthi uGono esuswe esikhundleni sokukhokhela i Reserve Bank, lokhu athe akusoze kwenzakale.

IMDC ithi uGono kumele esuswe esikhundleni sakhe kanye legqwetha elikhulu likahulumende uMnu Johannes Tomana ngoba bengakhethwanga ngemfanelo.

Abazi ngokwenzakalayo bathi ngaphandle kokulobela inhloko kahulumende uMnu Morgan Tsvangirai incwadi ekhonona ngokuhlukuluzwa ngumphathintambo wezemali uMnu Tendai Biti, uGono selobele njalo i Joint Monitoring and Implementation Comitte (JOMIC) incwadi efanayo esithi kumele lolugatsha lungenele ngoba uBiti emhlukuluza.

UGono ubikwa njalo eke wazinikela ukutshiya umsebenzi kunyanga ezisanda kwedlula esithi kukhanya udaba lwakhe luphambanisa ingqubelaphambili kuhulumende womanyano kodwa uMugabe wakwala lokho.

Intathelizindaba njalo eyisiphathamandla Semavambo/Kusile, yona ekhokhelwa nguMnu Simba Makoni uMnu Denford Magora ubika ukuthi uGono unikeze uMugabe incwadi yokutshiya umsebenzi ngoMgqibelo kodwa uMugabe wala ukuthi atshiye umsebenzi.